Non hai un club que esperte máis paixóns dentro e fóra de Alemaña. O St Pauli, o club do barrio portuario de Sankt Pauli en Hamburgo, converteuse nunha icona nos 80 ao ser o primeiro club do mundo que se facía antifascista, antisexista e antirracista incluíndo cláusulas nos seus estatutos. A bandeira pirata é o seu logo oficioso, e representa a oposición ao capitalismo. É unha icona mundial da esquerda no fútbol. Ademais, é o club con maior número de socias. O seu poder é grande: a súa presión fixo que o club retirase os anuncios dunha revista masculina do estadio, ao considerar que denigraba ás mulleres.
A súa esencia é absolutamente rompedora no fútbol mundial. "É o equipo da clase traballadora", declaraba Butje Rosenfeld, ex xogador do club e agora xornalista nunha reportaxe. Ademais, o club é seguido masivamente por grupos musicais alternativos de todo o mundo, desde Bad Religion a Asian Dub Foundation ou Turbonegro, que lle dedicou unha canción.
A súa incrible lexión de hinchas (estímase que, só en Alemaña, ten 11 millóns de simpatizantes, e colecciona máis de 500 clubs de fans en todo o mundo; cando xogaba en Terceira o seu estadio promediaba 15.000 espectadores cando a media da división era de 200) atraeu a multitude de patrocinadores. A marcas de coches Dacia sacou unha edición especial St Pauli do seu modelo Duster e Nike fabricou dúas edicións especiais das súas Dunk.
Con todo, ata nos patrocinadores decidiu ser innovador. Sankt Pauli é o 'barrio vermello' de Hamburgo, e por iso ningún club mellor para ser patrocinado por Orion, unha empresa de artigos eróticos en Internet. Para celebrar o ascenso, elaborou 20.000 condóns co escudo do club.
0 comentarios:
Publicar un comentario